written in the Bavarian dialect of the
ninth century.
Trohtin, dir uuirdu ih pigihtik allero minero suntono enti missatateo, alles deih eo missasprah edo missateta ędo missadahta, uuorto, enti uuercho enti kadanccho, des ih kyhukkm sedo ni kihukku, des ih uuizzanto kiteta ędo unuuizzanto, notac ędo unnotac, slaffanto ędo uuahento: meinsuuarteo enti lukino, kyridono enti unrehtero fizusheito, huorono so uue so ih so kiteta, enti unrehtero firinlusteo in muose enti in tranche enti in unrehtemo slaffe; daz du mir, trohtin, kanist enti kanada farkip enti daz ih fora dinen augon unscamanti si, enti daz ih in derru uueroltti minero suntono riuun enti harmscara hapan mozi. soliho so dino miltida sin, alles uualtenteo trohtin, kot almahtigo, kauuerdo mir helfan enti kauuerdo mir farkepan kanist enti kanada in dinemo rihe.
Kot almahtigo, kauuerdo mir helfan enti kauuizzida mir ia furistentida ia gaotan uuillun saman mit rehten galaupon mir fargepan za dinemo dionoste. trohtin, du in desa uueralt quami suntige za ganerienne, kauuerdo mih cahaltan enti kanerien. Christ, cotes sun, uuiho trohtin, soso du uuelles enti dino canada sin, tuo pi mih suntigun enti unuuirdigun scalh dinan, uuiho truhtin, kanadigo got, kauuerdo mir helfan suntikemo enti fartanemo dinemo scalhe uuanentemo dinero kanadono. enstigo enti milteo trohtin, du eino uueist uueo mino durfti sint: in dino kanada enti in dino miltida, uuiho
truhtin, pifilhu min herza ia minan cadanc ia minan uuillun ia mman mot ia minan lip ia miniu uuort ia miniu uuerh. leisti, uuiho truhtin, dino kanada in mir suntigin enti unuuirdigin scalhe dinemo: kauuerdo mih canerien fona allemo upile.